L’aur’amara fa·ls bruels brancutz
L’aur’amara fa·ls bruels brancutz
clarzir, que·l dous’espeys’ab fuelhs,
e·ls letz becx dels auzels ramencx
te balbs e mutz, pars e non-pars.
Per qu’ieu m’esfortz de far e dir plazers
a manhs? Per ley qui m’a virat bas d’aut,
don tem morir, si·ls afans no·m asoma.
Tan fo clara ma prima lutz
d’eslir lieys, don cre·l cors los huelhs,
non pretz necx mans dos angovencs
d’autra. S’eslutz rars mos preyars,
pero deportz m’es e d’auzir volers
bos motz ses grey de lieys, don tan m’azaut
qu’al sieu servir suy del pe tro qu’al coma.
Amors, guara! Suy be vengutz?
Qu’auzir tem far, si·m dezacuelhs,
tals detz pecx que t’es mielhs que·t trencx;
qu’ieu suy fis drutz cars e non vars,
ma·l cors ferms fortz me fai cobrir mans vers,
qu’ab tot lo ney m’agr’obs us bays al caut
cor refrezir, que no·y val autra goma.
Si m’ampara silh que·m trahutz
d'aizir si qu’es de pretz capduehls,
dels quetz precx qu’ai dedins a rencx
l’er fort rendutz clars mos pensars:
qu’ieu fora mortz mas fa·m suffrir l’espers,
que·lh prec que·m brey, qu’aisso·m te let e baut,
que d’als jauzir no·m val jois uma poma.
Douza car’a totz ayps volgutz,
sofrir m’er per os manhs orguelhs,
quar etz decx de totz mos fadencx,
don ai manhs brutz pars. E guabars
de vos no·m tortz ni·m fay partir avers,
c’anc non amey ren tant ab menhs d’ufaut,
ans voz dezir plus que Dieu silh de Doma.
Ara·t para, chans e condutz,
formir al rey que t'er escuelhs,
quar pretz, secx say, lay es doblencx
e mantengutz dars e manjars.
De joy la·t portz, son anel mir s·il ders,
qu’anc non estey jorn d’Arago que·l saut
no·y volgues ir, mas say m’an clamat: roma!
Faitz es l’acortz, qu’el cor remir totz sers
lieys cuy dompney ses parsonier, Arnaut,
qu’en autr’albir n’es fort m’entent’a soma.
Doutz brais e critz
Doutz brais e critz,
lais e cantars e voutas
aug dels auzels q'en lur latin fant precs
qecs ab sa par, atressi cum nos fam
a las amigas en cui entendem;
e doncas ieu q’en la genssor entendi
dei far chansson sobre totz de bell’obra
que no·i aia mot fals ni rim’estrampa.
Non fui marritz
ni non presi destoutas
al prim q’intriei el chastel dinz los decs,
lai on estai midonz, don ai gran fam
c’anc non l’ac tal lo nebotz Sain Guillem;
mil vetz lo jorn en badaill e·m n’estendi
per la bella que totas autras sobra
tant cant val mais fis gaugz q’ira ni rampa.
Ben fui grazitz
e mas paraulas coutas,
per so que jes al chausir no fui pecs,
anz volgui mais prendre fin aur que ram,
lo jorn qez ieu e midonz nos baisem
e·m fetz escut de son bel mantel endi
que lausengier fals, lenga de colobra,
non o visson, don tan mals motz escampa.
Dieus lo chauzitz,
per cui foron assoutas
las faillidas que fetz Longis lo cecs,
voilla, si·l platz, q’ieu e midonz jassam
en la chambra on amdui nos mandem
uns rics convens don tan gran joi atendi,
qe·l seu bel cors baisan rizen descobra
e qe·l remir contra·l lum de la lampa.
Ges rams floritz
de floretas envoutas
cui fan tremblar auzelhon ab lurs becs
non es plus frescs, per q’ieu no volh Roam
aver ses lieis ni tot Jerusalem;
pero totz fis, mas juntas, a li·m rendi,
q’en liei amar agr’ondra·l reis de Dobra
o cehl cui es l’Estel e Luna-pampa.
Bocca, que ditz?
q'eu crei qe·m auras toutas
tals promessas don l’emperaire grecs
en for’onratz o·l senher de Roam
o·l reis que ten Sur e Jerusalem;
doncs ben sui fols que quier tan qe·m rependi,
que jes Amors non a poder qe·m cobra,
ni savis es nuls om qui joi acampa.
Los deschauzitz
ab las lengas esmoutas
non dupt’ieu jes, si·l seignor dels galecs
an fag faillir, per q’es dreitz si·l blasmam,
que son paren pres romieu, so sabem,
Raimon lo filh del comte, et aprendi
que greu fara·l reis Ferrans de pretz cobra
si mantenen no·l solv e no·l escampa.
Eu l’agra vist, mas estiei per tal obra,
c’al coronar fui del bon rei d’Estampa.
Lo ferm voler q’el cor m’intra
Lo ferm voler q’el cor m’intra
no·m pot jes becs escoissendre ni ongla
de lausengier, qui pert per maldir s’arma;
e car non l’aus batr’ab ram ni ab verga,
sivals a frau, lai on non aurai oncle,
jauzirai joi, en vergier o dinz cambra.
Qan mi soven de la cambra
on a mon dan sai que nuills hom non intra
anz me son tuich plus que fraire ni oncle,
non ai membre fremisca, neis l’ongla,
aissi cum fai l’enfas denant la verga:
tal paor ai no·l sia trop de l’arma.
Del cors li fos, non de l’arma,
e cossentis m’a celat dinz sa cambra!
Que plus mi nafra·l cor que colps de verga
car lo sieus sers lai on ill es non intra;
totz temps serai ab lieis cum carns et ongla,
e non creirai chastic d’amic ni d’oncle.
Anc la seror de mon oncle
non amei plus ni tant, per aqest’arma!
C’aitant vezis cum es lo detz de l’ongla,
s’a liei plagues, volgr'esser de sa cambra;
de mi pot far l’amors q’inz el cor m’intra
mieills a son vol c’om fortz de frevol verga.
Pois flori la seca verga
ni d’En Adam mogron nebot ni oncle,
tant fin’amors cum cella q’el cor m’intra
non cuig fos anc en cors, ni eis en arma;
on q’ill estei, fors en plaz’, o dins cambra,
mos cors no·is part de lieis tant cum ten l’ongla.
C’aissi s’enpren e s’enongla
mos cors en lei cum l’escorss’ en la verga;
q’ill m’es de joi tors e palaitz e cambra,
e non am tant fraire, paren ni oncle:
q’en paradis n’aura doble joi m’arma,
si ja nuills hom per ben amar lai intra.
Arnautz tramet sa chansson d’ongl’e d’oncle,
a grat de lieis que de sa verg’a l’arma,
son Desirat, cui pretz en cambra intra.
Arnaut Daniel (1150-ca. 1200). Trovador provenzal, nacido en Ribérac (Périgord) hacia el 1150 y fallecido hacia el 1200. En 1180 presenció la coronación de Felipe Augusto, y sabemos por sus poesías que estuvo cierto tiempo en España. Amigo de Bertran de Born, gozó de la protección de Ricardo Corazón de León. De este autor, claramente influido por Marcabru y Raimbaut d'Aurenga, nos ha llegado un sirventés de contenido obsceno, una sextina provenzal y 16 canciones amorosas, dos de ellas con música. Arnault Daniel, maestro en la métrica y siempre dispuesto a servirse del vocabulario más exótico, sorprende por la ambigüedad de sus poemas, que atrajeron a Dante, a Petrarca y, en época moderna, a D'Annunzio, Ungaretti o Ezra Pound.
Renato Sandoval (Lima, Perú, 1957). Poeta y traductor peruano. Ha publicado, en poesía, Singladuras, Pértigas, Luces de talud, Nostos, El revés y la fuga y Suzuki Blues. Poemas suyos han sido traducidos al francés, alemán, italiano, danés y finlandés. En ensayo, El centinela de fuego, libro dedicado al poeta simbolista José María Eguren, y Ptyx: Eielson en el caracol. En el campo de la traducción, son conocidas, entre otras, sus versiones de Pavese, Quasimodo, Tabucchi, Arnaut Daniel, Tieck, Rilke, Kafka, Södergran, Ågren, Haavikko, Saarikoski, Dinesen, Boberg, Drummond de Andrade y Sylvia Plath, así como un par de piezas de teatro escritas en francés por César Vallejo y una antología de cuentos de Quebec (Canadá) bajo el título La mano de dios. En 1988 obtuvo el primer premio de “El cuento de las mil palabras”, del semanario Caretas. Dirige la editorial Nido de Cuervos y las revistas Evohé y Fórnix. Actualmente dicta literatura alemana, literatura nórdica y literatura francesa medieval en la Pontificia Universidad Católica del Perú.